ភ្នំពេញ៖ ឧបនាយករដ្ឋមន្ត្រី រដ្ឋមន្ត្រីការបរទេសនិងសហប្រតិបត្តិការណ៍លោក ប្រាក់ សុខុន បានទូរស័ព្ទផ្ទាល់មាត់ដើម្បីអបអរសាទររដ្ឋមន្ត្រីការបរទេសអូស្ត្រាលីថ្មី លោកស្រី ផិននី វង់។ នេះបើតាមការបង្ហោះលើបណ្តាញសង្គមហ្វេកបុកផ្លូវការរបស់លោកឧបនាយកររដ្ឋមន្ត្រីនៅរសៀលថ្ងៃអង្គារ៍ ទី៧ ខែឧសភានេះ។

លោក ប្រាក់ សុខុន បានសរសេរថា «ខ្ញុំទើបតែមានឱកាសបានអបអរសាទរលោកជំទាវ ផិននី វង់ ផ្ទាល់មាត់តាមទូរស័ព្ទ នៅរសៀលនេះ ខណៈដែលគាត់ត្រូវបានតែងតាំងជារដ្ឋមន្ត្រីការបរទេសអូស្ត្រាលីថ្មី»។

រដ្ឋមន្ត្រីការបរទេសកម្ពុជា លោក ប្រាក់ សុខុន បានបន្តទៀតថា «កម្ពុជា និងអូស្ត្រាលី គឺជាដៃគូយូរអង្វែងដែលមានទំនាក់ទំនងការទូតផ្លូវការ ៧ទសវត្សរ៍មកហើយ។ ប៉ុន្មានឆ្នាំចុងក្រោយនេះក្នុងគ្រាមានទុក្ខលំបាក ទំនាក់ទំនងរបស់យើងកាន់តែមានភាពជិតស្និទ្ធជាងមុន ខណៈដែលយើង និងពិភពលោកបាននឹងកំពុងប្រយុទ្ធប្រឆាំងជំងឺកូវីដ-១៩។ ក្នុងន័យនេះ កម្ពុជាក៏សូមថ្លែងអំណរគុណយ៉ាងជ្រាលជ្រៅចំពោះជំនួយដ៏ថ្លៃថ្លាពីរដ្ឋាភិបាល និងប្រជាជនអូស្ត្រាលី»។

លោក ប្រាក់ សុខុន ថា ប្រទេសទាំងពីរបានប្តេជ្ញាធ្វើការយ៉ាងសកម្មជាមួយគ្នាទាំងក្នុងក្របខ័ណ្ឌទ្វេភាគី និងពហុភាគី ដោយគិតប្រជាជនរបស់យើងជាស្នូលនៃកិច្ចខិតខំប្រឹងប្រែងទាំងឡាយ៕